Chust tumanida yangi bolalar bog‘chasi ish boshladi

Yangi yil bayrami arafasida 2023-yilning 30-dekabr kuni Namangan viloyati Chust tumanidagi “Yangiyer” mahallasida Iqtisodiyot va moliya vazirligining “Qishloq infratuzilmasini rivojlantirish” loyihasi doirasida yangi barpo etilgan 63-sonli maktabgacha ta’lim muassasasining tantanali ochilish marosimi bo‘lib o‘tdi.

Mazkur bolalar bog‘chasi “Churtuk mega stroy” MChJ tomonidan qisqa muddatda zamonaviy andoza va talablar asosida bunyod etilgan bo‘lib jami 120 o‘ringa mo‘ljallangan. Yangi yildan bolajonlar uchun o‘z eshiklarini ochuvchi maktabgacha ta’lim muassasasi tarbiyalanuvchilar uchun zaruriy jihozlar va inventarlar bilan ta’minlangan.